FM97.5 / LIVE

ჭაობი და მძორის სუნი ტურისტული ბუმის ნაცვლად

მთავარიეკონომიკა 19.03.2014
ორ მილიონ ლარად მოწყობილ ხელოვნური ტბის გასართობ კომპლექსში, ტბის ნაწილი დაშრა, ნაწილი დაჭაობდა, წყლის მილები დასკდა, შადრევნის კი დაიღუნა; „ნაციონალების“ მიერ მეორადი მილებით შესრულებული სამუშაოები თუ „ოცნების“ უყურადღებობა; ყოფილი და მოქმედი ხელისუფლების ურთიერთბრალდებები და ჩავარდნილი პროექტი, რომელიც ბიუჯეტს დამატებით ათასობით ლარი დაუჯდება;

ჭაობი და მძორის სუნი ტურისტული ბუმის ნაცვლად
წელიწადში მხოლოდ ერთი ღონისძიება

ხელისუფლების შეცვლიდან დღემდე, ახალციხეში, ხელოვნურ ტბაზე მხოლოდ ერთი ღონისძიება გაიმართა. 2013 წლის შემოდგომით აქ გარბენი - „ახალციხე 2013“ ჩატარდა.

ახალციხის მუნიციპალიტეტის გამგეობის კულტურის სამსახურში ამბობენ, რომ ტბაზე ღონისძიებების გამართვას აზრი აღარ აქვს, რადგან აქ აღარც წყალია და არც შადრევანი. არადა, ხელოვნური ტბის გასართობი კომპლექსი, „ნაციონალური მოძრაობის“ ხელისუფლების სათავეში ყოფნის დროს, 400-კაციანი ამფითეატრითა და შადრევნით, სწორედ კულტურული ღონისძიებების ჩასატარებლად გაკეთდა. კულტურის სამსახურის მაშინდელი უფროსის, იური ზარიძის თქმით, აქ სხვადასხვა ღონისძიებები მართლაც ხშირად იმართებოდა.

გართობისა და დასვენებისთვის ტბასთან ორი კაფეც აშენდა: „ფონტანა“ და „ასტორია“. ორივე მათგანის მფლობელს ეკონომიკის სამინისტრომ მიწა უსასყიდლოდ გადასცა.

ჭაობი და მძორის სუნი ტურისტული ბუმის ნაცვლადგასართობი კომპლექსის საზეიმოდ გახსნიდან, 2012 წლის 30 ივნისიდან, 6 თვეში, „ასტორია“ კლიენტის ნაკლებობის გამო დაიკეტა. „ფონტანამ“ კი მუშაობა იმ იმედით გააგრძელა, რომ აქ ზაფხულობით ტურისტების სიმრავლე იქნებოდა. მაგრამ, როგორც მისი მფლობელი ტატო ტალახაძე ამბობს: „ტბის დაშრობამ და შადრევნის გაფუჭებამ ტურისტების რაოდენობაზე უარყოფითად იმოქმედა“.

რატომ ასდის წყალს სუნი

წყლის კლებასთან და ტემპერატურის მატებასთან ერთად ტბაზე უსიამოვნო სუნიც დგება.

„აქ ძვირფასი თევზები გვყავდა: სქელშუბლა, კარპი, კარასი. ისინი გვაჩუქეს და ტბაში იმიტომ გავუშვით, რომ ბალახს ჭამდნენ, ასე წყალი სუფთად ინახებოდა. შესალოა, თევზები დაიხოცა და ახლა იქ მძორის სუნი იმიტომაცაა“, - ამბობს ახალციხის მუნიციპალიტეტის ყოფილი გამგებელი გელა დემეტრაძე. ქალაქში ტბის კომპლექსი სწორედ მისი გამგებლობის დროს აშენდა.

რატომ დაშრა ტბა?

დემეტრაძის თქმით, ტბის დაშრობის მთავარი მიზეზი, იმ სათავე ნაგებობის გაუწმენდაობაა, საიდანაც ტბაში სუფთა წყალი მიედინება: „სათავე 4-5 კილომეტრის მოშორებითაა, გვინდოდა, რომ ტბაში სუფთა წყალი ჩასულიყო და ამიტომ იქ ბუნებრივი დრენაჟი გავაკეთეთ. მას წელიწადში 3-4-ჯერ მაინც უნდა გაწმენდა, მაგრამ მას შემდეგ, რაც ჩვენ აღარ ვართ ხელისუფლებაში, აღარ გაწმენდილა. რამდენჯერმე ჩვენი ჯიბის ფულითაც ვიქირავეთ ტრაქტორები და გავწმინდეთ, მაგრამ ამ ყველაფრით ჩვენც დავიღალეთ“.

ჭაობი და მძორის სუნი ტურისტული ბუმის ნაცვლადსათავე ნაგებობასთან ერთად დაზიანებულია წყლის მილები, რომლითაც ტბაში წყალი ჩაედინება. წყლის დონის კლების გამო გაიყინა, დაიღუნა და დასკდა შადრევნის მილებიც, გაფუჭდა ძრავი და დაზიანდა ის ფრთები, რომლის საშუალებითაც წყალი მილებში წნევით იწნეხებოდა.

„პრობლემა არის ის, რომ ტბა „ნაციონალების“ დროს გაკეთდა და ამიტომ „ოცნება“ ხელს არ კიდებს“, - ასე ხსნის დემეტრაძე „ოცნების“ ხელისუფლების უყურადღებობას ორ მილიონად გაკეთებული გასართობი კომპლექსის მიმართ და ამატებს, რომ ახლა მისი აღდგენა სავარაუდოდ 100 ათასი ლარი დაჯდება.

გამგებელი ტბის შესახებ დასმული კითხვების საპასუხოდ „ვერ იცლის“

ახალციხის მუნიციპალიტეტის ბიუჯეტში ცალკე გაწერილი მუხლი ტბის მოვლა-შენახვისათვის არ არსებობს. ადგილობრივი თვითმმართველობა მის ბალანსზე არსებული კომპლექსისთვის გარე განათებისა და დასუფთავების ხარჯებს ფარავს. ასევე, უხდის ხელფასს ტბის მეთვალყურეს.

ჭაობი და მძორის სუნი ტურისტული ბუმის ნაცვლადსაიდან აპირებს ახალციხის მუნიციპალიტეტის გამგეობა იმ თანხის მობილიზებას, რომელიც წელიწადნახევრის წინ გაკეთებული ტბის რეაბილიტაციას დასჭირდება, ან გეგმავს თუ არა საერთოდ ამ მიმართულებით რაიმე ღონისძიების გატარებას, ეს კითხვები პასუხგაუცემელი დარჩა. „ოცნების“ ხელისულფების პირობებში მწყობრიდან გამოსულ 2-მილიონიან პროექტზე სასაუბროდ ახალციხის მუნიციპალიტეტის გამგებლის მოვალეობის შემსრულებელმა ბესიკ ბლიაძემ „ვერ მოიცალა“.

ახალციხის მუნიციპალიტეტის საკრებულოს თავმჯდომარე ოლეგ სანდროშვილი კი, რომელიც აღნიშნულ პოსტზე ასევე „ოცნების“ ხელისულფების სათავეში მოსვლის შემდეგ დაინიშნა, ამბობს, რომ ტბის აღსადგენად ხარჯთაღრიცხვის შედგენა ეკონომიკისა და ინფრასტრუქტურის განვითარების სამსახურს დაევალა, თუმცა, მას შემდეგ აღნიშნული სამსახურის რეორგანიზაცია მოხდა, უფროსი შეიცვალა და „ახლა ის დოკუმენტები სადაა, არავინ იცის“.

ტბა მეორადი მილებით გაკეთდა

სანდროშვილი, ისევე როგორც დემეტრაძე, ამბობს, რომ ახლა ტბაზე ყველაფრის შეცვლა საკმაოდ ძვირი დაჯდება. თუმცა იგი კატეგორიულად უარყოფს ოპონენტის მოსაზრებას იმის შესახებ, რომ ტბა უყურადღებოდ იმიტომ დარჩა, რომ ის „ნაციონალების“ გაკეთებულია.
უფრო მეტიც, სანდროშვილი ტბის დაშრობაში სწორედ „ნაციონალებს“ ადანაშაულებს და ამბობს, რომ ტრასა სათავე ნაგებობიდან ტბამდე მეორადი მილებით მოეწყო: „დაუშვებელი იყო ამხელა მშენებლობაში მეორადი მილების გამოყენება, ამიტომაც გაფუჭდა“.

მილები რომ სიძველის გამო გამოვიდა მწყობრიდან, ამაზე ტბის ზედამხედველი ბესიკ ფეიქრიშვილიც საუბრობს: „დამპალია და დიდხანს ვეღარ გაძლო“.

მშენებლობისას რომ მეორადი მილები გამოიყენეს, ამას დემეტრაძეც ადასტურებს, თუმცა კატეგორიულად უარყოფს იმას, რომ ტბა მილების გამო დაშრა: „ეგ მილები ეკონომიკის სამინისტრომ გადმოგვცა და მათი ღირებულება ხარჯთაღრიცხვაში გათვალისწინებული არც ყოფილა“.

რაც შეეხება ტბის სხვა მოწყობილობებს, სანდროშვილი აცხადებს, რომ მშენებლობისას ისინი კლიმატური პირობების მიხედვით უნდა შეერჩიათ: „დანადგარები არ შეესაბამებოდა მოთხოვნებს, თუნდაც კლიმატურ პირობებს და ამიტომ გამოვიდა მწყობრიდან. რაც არის, იგივეს დატოვება აღარ შეიძლება. გამოვაცხადებთ ტენდერს და ვინც გაიმარჯვებს, ის შეასრულებს ტბაზე სარეაბილიტაციო სამუშაოებს“.

ჭაობი და მძორის სუნი ტურისტული ბუმის ნაცვლადრაც შეეხება თევზებს, სანდროშვილის თქმით, თუ ისინი თვითმმართველობას საჩუქრად გადაეცა, მაშინ ჩუქების ხელშეკრულება უნდა არსებობდეს, რომ ეს თევზები მუნიციპალიტეტის საკუთრებაა, მსგავსი დოკუმენტი კი ადგილობრივ თვითმმართველობაში არ არსებობს.
იმ შემთხვევაში თუ „ნაციონალური მოძრაობა“ ხელისუფლების სათავეში დარჩებოდა, ტბაზე გამწვანების, ასევე, ანტრაქციონების გაკეთებას გეგმავდა. „ოცნებამ“ კი ჯერ ტბის აღდგენაზე უნდა იზრუნოს, ხარჯთაღრიცხვა შეადგინოს, თუ ხარჯებს გაწვდება ტენდერი გამოაცხადოს და სამუშაოების შესრულებას შეუდგეს.

ამასობაში კი, „ასტორიას“ მფლობელი მალხაზ მანველიშვილი, ოპტიმიზმს არ კარგავს და იმ იმედით, რომ ზაფხულში ტბა ისევ წყლით გაივსება და იქ შადრევანიც ჩაირთვება, გაჩერებული ობიექტის ამოქმედებას და მეორე სართულის დადგმას გეგმავს: „ფასებს დავწევთ, ობიექტი ძირითადად სტუდენტებზე იქნება გათვლილი და თუ ყველაფერი ბევრად ნაკლები ეღირება ვიდრე სხვაგან, არც კლიენტი მოგვაკლდება“.

[თამუნა უჩიძე, ახალციხე]


18.10.2019 ბორჯომელი ბაკურ გელაშვილი საქართველოში ოთხ საუკეთესო მასწავლებელს შორის მოხვდა

18.10.2019 ზარზმაში საჯარო სკოლა გაიხსნა

17.10.2019 განათლების სამინისტრო ესეების კონკურსს აცხადებს

16.10.2019 სამცხე-ჯავახეთში კომპიუტერი 200–მდე წარჩინებულ მოსწავლეს გადაეცემა

22.04.2014 ჯილეხისა და თურქულის ვაქცინაცია დაიწყო

08.04.2014 ასპინძის საავადმყოფოს ექიმებმა შპს „ადითს“ სასამართლო მოუგეს

05.04.2014 რა იცვლება სასწრაფო სამედიცინო დახმარებაში?

21.03.2014 საქართველოში ჰოსპიტალური საწოლების რაოდენობამ იკლო

21.10.2019 ევროპა მაგარია! სოციალური რეკლამა [ვიდეო]

21.10.2019 ახალციხის ცენტრალურ სტადიონზე მძლეოსნობაში შეჯიბრი მიმდინარეობს

20.10.2019 ახალციხის თოჯინების თეატრი ხატია პარუნაშვილის დასახმარებლად სპექტაკლს გამართავს

18.10.2019 აბასთუმნელები: ‘საუბრობენ არაზინდოდან ჩვენს გასახლებაზე’

24.12.2013 ბორჯომში ახალ წელს ერთი დღით ადრე იზეიმებენ

27.11.2013 რეჟისორი ვახტანგ ბერიძე მესხეთის თეატრს მადლობას უხდის

25.10.2013 ახალციხეში ანსამბლ „სეუს“ კონცერტი მიმდინარეობს

24.10.2013 მესხეთის თეატრში "წვიმის გამყიდველს" წარმოადგენენ

18.10.2019 აწყვიტაში ველიჯანაშვილების ოჯახი ღამეს მეზობელთან ათევს [ფოტო/ვიდეო]

09.10.2019 ‘უბრალო პროფესიის’ რთული საქმე - 83 წლის ფოსტალიონი ახალციხიდან [ფოტო/ვიდეო]

07.10.2019 წართმეული სამშობლო - 'ოქროს მაძიებელი' მესხები [ფოტო/ვიდეო]

07.10.2019 ‘ქალაქური ყაიდის სოფელი’ [ფოტო]

მსგავს თემაზე

მერია ახალციხის ტბის რეაბილიტაციას იწყებს
ახალციხის ხელოვნურ ტბაზე შადრევნები აღარ მუშაობს
ტბა მხოლოდ ერთი სეზონისთვის
ზაფხულის ბოლოს, ახალციხის დამშრალ ტბაში წყალი შეუშვეს
ქვეწარმავლები ‘ახალციხის ტბაზე’ – რას აპირებს ტბის ადმინისტრაცია [Video]
ახალციხის ტბაზე შადრევანი ამუშავდა
ახალციხის ტბა  სეზონის ბოლოს – დაპირებები და შედეგი