FM97.5 / LIVE

მიქელწმინდას ამბები [ფოტო]

მთავარისიახლე, რეპორტაჟი 21.11.2019
მიქელწმინდა ბერძნების სოფელი იყო, ახლა აქ ბერძნების მხოლოდ ორი, ორიც ქართული და ალბათ ხუთი სომხური ოჯახი ცხოვრობს, დაახლოებით ოცი ადამიანი. სოფელში არ არის გზა, არ აქვთ წყალი. მიქელწმინდა ყოველდღიურად იცლება.

მიქელწმინდას ამბები [ფოტო]

მიქელწმინდა – ახალციხის მუნიციპალიტეტის სოფელი

ნოემბრის თვეა, სუსხია. ამ დროს სოფლის ორღობეებში ძნელია ვინმეს გადაეყარო და თან სოფელი თუ დაცლილია და სადღაც ოცი ადამიანი თუ ცხოვრობს.

სახურავებიდანაც არ ამოდის კვამლი, ამით მაინც რომ მიხვდე რომ აქ ცხოვრობენ, დაიძახო რაიმე სახელი, დაძახებას ძაღლის ყეფა მოჰყვეს, ყეფას კი სახლიდან პატრონის გამოსვლა. მერე „ფეჩზე“ „კოფეს“ მოდუღება და სოფლის ისტორიების მოსმენა.

ახლა ცარიელ ორღობეში ვდგავართ, არავინ ჩანს. ჯერ ხმელი ფოთლების დაწვის სუნი მოვიდა და მერე ზემოთ კვამლიც ავარდა. ვიღაცამ ალბათ ფოთლები მოაგროვა და წვავს, მივდივართ.

ჟორა მათევოსიანს ვხვდებით. ის მიქელწმინდაში დაიბადა და გაიზარდა.

„მიყვარს აქაურობა, ან სად უნდა წავიდე რო? აი, გზა და წყალი რომ იყოს არც არავინ წავიდოდა“, – მეუბნება და ამატებს „გლეხს მეტი რა უნდა, მიწა გვაქვს, დავამუშავებდით, მაგრამ წყალი რომ არ არის კარტოფილი როგორ უნდა მოიყვანო?“

მიქელწმინდას ამბები [ფოტო]

ევა კობაიძეს თავის სახლის წინ შევხვდით. 80 წლისაა, 60 წელია უკვე მიქელწმინდაში ცხოვრობს.

„20 წლის ვიყავი ასპინძის სოფელ იდუმალადან აქ როცა გავთხოვდი, ბერძენს გამოვყევი ცოლად, გვარად გერასიმიდს. მის შემდეგ მიქელწმინდაში ვარ. ოთხი შვილი მყავს და ოცი შვილიშვილ–შვილთაშვილი. ქმარი შვიდი წელია რაც გარდამეცვალა“, – მეუბნება ის.

ახლა ევა კობაიძე სოფელში შვილიშვილთან ერთად ცხოვრობს.

„ძნელია ახალგაზრდისთვის ასეთ მივარდნილ სოფელში ცხოვრება, მაგრამ არ მიდის, მარტო არ მტოვებს. ეგ მყავს იმედად“, – ამბობს მოხუცი და ეზოს იმ მხარეს იხედება სადაც შვილიშვილმა გაიარა.

ევა კობაიძის შვილები და შვილიშვილები საბერძნეთში არიან წასულები. იქ მუშაობენ.

„ყველა ასეა გაბნეული და წასული ქვეყნიდან, ზოგი სად, ზოგი სად. გვიჭირს ცხოვრება“, – ამბობს ის.

მიქელწმინდას ამბები [ფოტო]

სოფელში ადრე ბერძნული სკოლა ყოფილა. ახლა მიქელწმინდასთან ახლოს სოფელ წირაში ოთხკლასიანი სკოლაა, მაღალ კლასებში მოსწავლეები სოფელ წყრუთში გადადიან სასწავლებლად.

მალე მიქელწმინდიდან სკოლაში აღარავინ ივლის.

სოფელში დგას წმინდა მიქაელის სახელობის ეკლესია და როგორც აქაურებმა მითხრეს სოფლის სახელწოდებაც ეკლესიიდან მოდის.

მიქელწმინდას ამბები [ფოტო]

მიქელწმინდაში მარტო ცხოვრობს 79 წლის არსენ მესხიძე. როცა ასაკი ვკითხეთ 99 წლის ვარო, უცებ გვითხრა, შემდეგ კი გადაიხარხარა – „ენამ მიყივლაო“.

მან მოგვიყვა – „მიქელწმინდა იყო მესხიძეების გვარის, ეს როგორც ლეგენდა გადმოგვცეს წინაპრებმა. აქ ცხოვრობდა ერკოტელი ექიმბაში ტივაძე, ღრმადმოხუცებული გარდაიცვალა და ის ამბობდა ეს სოფელი მესხიძეების არისო. ეკლესია პაპაჩემის წინაპარს აუშენებია, ივანე მესხიძეს. მას ჩამოუყვანია ტაძრის მშენებლობაზე ბერძნები და მერე რომ მორჩენილან საქმეს, ივანეს უთქვამს რატომ მიდიხართ, აქ ქვა არის დიდებული, დასახლდით და იმუშავეთო“.

არსენ მესხიძე ამბობს, რომ მიქელწმინდა უძველესი, ისტორიული სოფელია.

„ასე ოცი წლის წინ დაბლა მხარეს ჭა ამოვთხარე ხუთი მეტრის სიღრმეზე და ამოვიდა თიხის ნატეხები, ჭურჭლის ნამსხვრევები, კედელი. ეს ყველაფერი მოვაგროვე და წავიღე ახალციხეში მუზეუმში, მერე თბილისიდანაც ამოვიდნენ, თუმცა დიდად დაინტერესება არ მოჰყოლია.

წყალი როცა გამოგვყავდა ზემოთ ფერდიდან, მაშინაც ამოვიდა მიწიდან გამომწვარი თიხა, ანუ მანდ, სადღაც, თიხის გამოსაწვავი ღუმელი იდგა“.

არსენ მესხიძის შვილები ახალციხეში ცხოვრობენ.

„ქალაქში არ წავედი. მარტო ვარ. მეჩხუბებიან შვილები ზამთარში მაინც ჩამოდიო. ვერ გავძელი კაცო, მთელი დღე დაჯექი და მიაჩერდი ტელევიზორს. აქ უკვე დაღლილი ვარ, წისქვილი მაქვს, ჭადის ფქვილს მოიტანს კაცი დავუფქვავ, ყაუდს დავუფქვავ, ვილაპარაკებთ. ქალაქში რა გამაჩერებს“, – მეუბნება და მიღიმის.

– ყაუდი რა არის? ვეკითხები.

– ყაუდი ერთმანეთში არეული სიმინდი და მოხალული ხორბალია. ეგ უნდა დაფქვა დაასხამ წყალს და შეჭამ, თუ გინდა შაქარი დაამატე. კუჭნაწლავისთვის არის მისწრება, თან ნოყიერია ძაან.


– ყურძენი გქონიათ, – ვეუბნები და ეზოსკენ ვიხედები, სადაც დიდი ტალავერი ჩანს.
– კი, შავი ყურძენი მაქვს, დირბულა ჰქვია, ტაშისკარიდან ჩამოვიტანე. დიდებული ღვინო დგება. შავი ღვინო მაწყინარია, ეს არა. არაყსაც ვხდი, ჭანჭურისგან, ჭაჭისგან.

– მიწასაც ამუშავებთ?

– ეზოში ცოტა კიტრი, ლობიო, პამიდორი მომყავს. წყალი არაა სოფელში, თორემ... ახლა რასაც გეტყვით დაწერეთ, მეუბნება და თან აგრძელებს – დაწერეთ და მიიტანეთ ხელისუფლებამდე. სოფელთან არის ბუსყანა – თათრული სიტყვაა და ყინულხანას ნიშნავს. ეს არის ბუნებრივი მაცივარი, ისე აციებს წყალს, აი, მაცივარი ხომ უცვლის წყალს გემოს, აქ შენახული წყალი არა. ჰოდა, მანდ არის კლდე და დარწმუნებული ვარ კლდის ქვეშ დიდი რაღაც იმალება. აი, ახალი ათონის მსგავსი მღვიმე იქნება. ამბობენ ზამთარში დიდი თოვლის დროს მანდ თოვლი დნება და ორთქლი ამოდისო, დაბლა კი მური ჩნდებაო. ათონზე დიდი რაღაც იმალება მანდ, ერთი აფეთქება უნდა, ძნელია? მიიტანეთ ხელისუფლებამდე.

დგას ჩემს წინ მაღალი, მხარბეჭიანი, ცისფერთვალება მოხუცი და ისეთი აღფრთოვანებით მიყვება ამბავს აღმოსაჩენი მღვიმეს შესახებ, რომ ძნელია არ დაწერო და დაპირება არ აასრულო.

მიქელწმინდას ამბები [ფოტო]

წამოვედით.

ევა კობაიძეს შვილიშვილი ჰყავს დიდი გრძელი ზამთრის გასატარებლად.
არსენ მესხიძეს იმდენი სათავგადასავლო ამბები აქვს გასახსენებელი ... და მერე ან შვილიშვილებს მოუყვება, ან რომელიმე ჟურნალისტს.

ჟორა მათევოსიანი კი როცა თავის კერკეტ კაკალს დაამტვრევს და კაკლის უღელს არაყისთვის შეინახავს, გაიფიქრებს, ნეტა გაისად მაინც შემოგვიყვანონ წყალი, ან ეს ბაღები მოვრწყო ან მოსავალი.

მიქელწმინდაში მალე მოთოვს.

[გულო კოხოძე, ახალციხე]


20.03.2020 რა პრობლემებს აწყდებიან სამცხე-ჯავახეთის სკოლებში დისტანციური სწავლებისას

16.03.2020 განათლების სამინისტროს რეკომენდაციები სასწავლო დაწესებულებებს

13.03.2020 ამერიკელი დიპლომატები ქართველ ბავშვებს წიგნებს ონლაინ წაუკითხავენ

11.03.2020 სასწავლო დაწესებულებებში არდადეგები 1-ელ აპრილამდე გახანგრძლივდა

22.04.2014 ჯილეხისა და თურქულის ვაქცინაცია დაიწყო

08.04.2014 ასპინძის საავადმყოფოს ექიმებმა შპს „ადითს“ სასამართლო მოუგეს

05.04.2014 რა იცვლება სასწრაფო სამედიცინო დახმარებაში?

21.03.2014 საქართველოში ჰოსპიტალური საწოლების რაოდენობამ იკლო

27.03.2020 ‘მორწმუნე საზოგადოებას დიდი გამოცდის ჩაბარება უწევს’- დეკანოზი ნიკოლოზ აბრამაშვილი

27.03.2020 ‘ამბობდნენ, მოკალით პეტროსიანიო’ – რას ჰყვება ყოფილი დეპუტატი ახალქალაქში მომხდარ სროლაზე

27.03.2020 ბავშვთა ვაქცინაცია უწყვეტად უნდა გაგრძელდეს - დაავადებათა კონტროლის ცენტრი

27.03.2020 დღეს არსად არ არის შეკრების დრო, არც სამეგობროში და არც ეკლესიებში - პაატა იმნაძე

24.12.2013 ბორჯომში ახალ წელს ერთი დღით ადრე იზეიმებენ

27.11.2013 რეჟისორი ვახტანგ ბერიძე მესხეთის თეატრს მადლობას უხდის

25.10.2013 ახალციხეში ანსამბლ „სეუს“ კონცერტი მიმდინარეობს

24.10.2013 მესხეთის თეატრში "წვიმის გამყიდველს" წარმოადგენენ

13.03.2020 სანამ მარცვალი ჩამოიცლება - უდელი მეწისქვილეს ამბავი [ფოტო/ვიდეო]

12.03.2020 ეკო-დერეფნის დამცველი ბუნების ქომაგები ადიგენიდან [ფოტო/ვიდეო]

03.03.2020 ლავაში, თაფლი და ‘ტაროსიკები’ - როგორია ტრადიციული სომხური ქორწილი [ვიდეო]

28.02.2020 რელიგიური უმცირესობების გასაჭირი - ვის აფინანსებს ხელისუფლება [ფოტო/ვიდეო]

მსგავს თემაზე

სოფელ ხევაშენში ოთხი დღეა წყალი არ მოდის
მზეთამზიელი გულნაზი
ღარიბი სოფელი ‘ოქროს ციხით’ [ფოტო/ვიდეო]
'ყველაფერი კარგადაა' – ამბობენ ისინი, თუმცა მაინც წარსულს მისტირიან [ფოტო]
სამი წყაროს იმედად

ცხოვრება ავარიულ სახლში
სოფელში ორღობეებმაც იციან დარდი