სამხრეთის კარიბჭე. FM97.5 / LIVE

წასულები და დარჩენილები

მთავარისიახლე, ბლოგები 07.07.2018
მატასის ბლოგი

წასულები და დარჩენილები

დღეს ახალგაზრდა კაცის დასაფლავებაზე ვიყავი. დედა შვილს ინტერნეტით დასტიროდა.

ფილმი მაქვს ნანახი ქართული, რომელშიც მსგავსი რამ ხდება, თუმცა ახლა, როცა ამ ყველაფრის თანამონაწილე გავხდი და ეკრანიდან კი არა, არამედ პირდაპირ ვუყურებდი ყველაფერს, ასმაგად შემზარავი აღმოჩნდა.

კუბოს წინ, მიცვალებულის ფეხებთან, სკამზე ახალგაზრდა გოგო იჯდა, მას ხელში ეჭირა მობილური, რომელიც პირდაპირ მიცვალებულს უყურებდა და იქიდან დედა დასტიროდა თავის შვილს, რომელიც 11 წელი არ ენახა და ვერც ამჯერად შეძლო ჩამოსვლა.
ისხდნენ მიცვალებულის გარშემო ჭირისუფლები და ხმადაბლა ტიროდნენ. მობილურს ხმა ბოლომდე ჰქონდა აწეული და დედის გოდება ირგვლივ ჩუმად მოქვითინეების ხმას ჰფარავდა.

დედა ტიროდა თავის შვილს, ტიროდა თავის თავს, ტიროდა გაუბედურებულ ქვეყანას, ტიროდა ჩვენზეც ასე რომ ვისხედით ვერაფერს ვცვლიდით და ვეგუებოდით ჩვენს ყოფას.

- ვაი, შვილო! ვაი, მე უბედურს! ვაი, თქვე უბედურებო!, -ტიროდა დედა და ვისხედით ჩვენც პაპანაქება სიცხეში სისხლგაყინულები, გალაკულ, პრიალა სკამებზე, მუხლებზე დაწყობილი ხელებით და მუჭში მოქცეული, თითებით, დაწიწკნილი თეთრი ,,სალფეტკებით“.

ხის იატაკი მოძრაობდა. მიცვალებულის კუბოს თავთან ხომ სულ დგას პატარა მაგიდა სანთლებისთვის, ხატებისთვის, კანდელისთვის. იქ გარდაცვლილის ფოტოც იდო, ჰოდა, იატაკის ყველა მოძრაობაზე ეს ფოტოც ნელა-ნელა ირხეოდა და მეჩვენებოდა, რომ გარდაცვლილი იღიმებოდა. დაგვცინოდა ყველას, შეშფოთებულები რომ ვისხედით, რომლებსაც ერთი სული გვქონდა ორი საათი მოსულიყო და დაგვესაფლავებინა, მერე ქელეხის სუფრას მივსხდომოდით და გრილ დარბაზში ამოგვესუნთქა, ლობიო გვეჭამა და ტკბილი, ქიშმიშიანი ბრინჯიც დაგვეყოლებინა. გვიყურებდა მიცვალებული და იღიმებოდა. მერე იმ მხარეს გახედვის შემეშინდა. ავდექი და გარეთ კუბოს თავსახური სადაც იყო მიყუდებული კედელზე და თან გაუსაძლისი სუნი იდგა ახლადშეღებილი კუბოს საღებავის, იქ დავდექი.

- არ ვარგა მანდ დგომა, - მითხრა ვიღაცამ და მკლავში ხელი წამავლო, გვერდზე გამწია.

- შვილი მაინც დარჩენოდა, - ჩაილაპარაკეს იქით.

- სახლი კი გაუკეთებია კარგად, - გარდაცვლილის დედაზე საუბრობდნენ.

- ხორციც ჰქონიათ სუფრაზე, - ხმადაბალი ჩურჩული მაინც აღწევდა ჩემამდე.

- მარხვაა და რა ხორცი აუტყდათ, - გავიგონე საპასუხო რეპლიკა.

გამოღებულ ჭიშკართან, ხის გრძელ სკამზე ახალგაზრდა გოგონები ისხდნენ. ჩემს გვერდზე მდგომმა, ჩრდილს შეფარებულმა კაცებმა, იქით რამდენჯერმე გაიხედეს, მერე ერთმა ხმამაღლა განაცხადა - ,,ახალგაზრდა ქართველი ქალი რომ გასვენებაში ასე მოკლე კაბას ჩაიცვამს იქაა დაღუპული ჩვენი საქმე“. არადა, რამდენჯერაც გავიხედე, იმდენჯერ გოგონებს უყურებდნენ. გოგოები კი ისხდნენ რაღაცნაირი ლაღები და ძალიან მწუხარეები. ერთმა ეტყობა იგრძნო კიდე კაცების მზერა, მუხლებზე ნაჭრის ჩანთა დაიფარა.

სოფელში 110 კომლი ცხოვრობს, საზღვარგარეთ სამუშაოდ 19 ქალია წასული, - მითხრეს ადგილობრივებმა.

ეზოში უარესად ჩამოცხა. ხეებისა და სახლის ჩრდილს მიეძალა ხალხი.

- არ გაიყვანოთ, არა! - ოთახიდან კივილი გაისმა.

- ,,ორი საათი გახდა“ - გაიფიქრა, ალბათ, ჩემსავით ირგვლივ მდგომმა ხალხმა და ყველანი სახლის კარს მივაშტერდით.

[მატასი]


13.07.2018 პროფესიული უნარების გამოცდაზე 154 მასწავლებელი არ გამოცხადდა

13.07.2018 სამაგისტრო გამოცდების ტესტის პასუხები სავარაუდოდ წინასწარ გამოქვეყნდა

13.07.2018 ტესტების შესაძლო გადაწერის ფაქტებზე, საგამოცდო ცენტრმა მოკვლევა დაასრულა

13.07.2018 'შპარგალკის' გამო ახალციხეში მასწავლებელს გამოცდა დაატოვებინეს

22.04.2014 ჯილეხისა და თურქულის ვაქცინაცია დაიწყო

08.04.2014 ასპინძის საავადმყოფოს ექიმებმა შპს „ადითს“ სასამართლო მოუგეს

05.04.2014 რა იცვლება სასწრაფო სამედიცინო დახმარებაში?

21.03.2014 საქართველოში ჰოსპიტალური საწოლების რაოდენობამ იკლო

16.07.2018 ტყიბულის შახტში კიდევ ოთხი ადამიანი დაიღუპა

15.07.2018 ბორჯომში 4 კვების ობიექტს საწარმოო პროცესი შეუჩერდა

14.07.2018 ახალციხის ციხეზე დათო ევგენიძის კონცერტი მიმდინარეობს

14.07.2018 ასპინძის მერი გარბენში საქართველოს ჩემპიონებს შეხვდა

24.12.2013 ბორჯომში ახალ წელს ერთი დღით ადრე იზეიმებენ

27.11.2013 რეჟისორი ვახტანგ ბერიძე მესხეთის თეატრს მადლობას უხდის

25.10.2013 ახალციხეში ანსამბლ „სეუს“ კონცერტი მიმდინარეობს

24.10.2013 მესხეთის თეატრში "წვიმის გამყიდველს" წარმოადგენენ

12.06.2018 მთიდან მთაში წასვლამდე – რეპორტაჟი კიკიბოდან [Photos]

20.02.2018 ადიგენის 55 სოფელი 6 ბიბლიოთეკის იმედად [Video]

20.12.2017 სკოლა ერთ ოთახში, ხუთი მოსწავლით [Photo/Video]

11.09.2017 ხმა სოფლიდან: სოფელ განძას მკვიდრების გატაცება [Audio]

მსგავს თემაზე

ასპინძაში ახალგაზრდა ქალი ჩამომხრჩვალი ნახეს
ბექა მარგიშვილის დედა: 'უფალმა შეუნდოს შალვას [აბულაძე] რაც გააკეთა'
ახალგაზრდა მამაკაცს დედასა და მეზობლებზე ძალადობაში ადანაშაულებენ
"ხმა სოფლიდან" – როცა მეზობლების იმედად ცხოვრობ [Audio]
ყველაზე ახალგაზრდა მეეზოვე ახალციხეში: „დედას საფლავი უნდა გამეკეთებინა, აქ მუშაობა იმიტომ დავიწყე“
ლილი ზუმბაძე: ‘5 000–მდე  მიცვალებული გავკვეთე,  სასაფლაოზე რომ გავდივარ, მგონია მკვდრები მომდევენ’
ავტოსაგზაო შემთხვევის შედეგად დედა-შვილი დაშავდა