FM97.5 / LIVE

მზითევი, ‘უმძრახობის’ ტრადიცია და ცხოვრება მესხურ ოდაში [Photo/Video]

მთავარისიახლე, საზოგადოება, რეპორტაჟი 18.04.2017
ელენე და დურმიშხან ასპანიძეები, ასპინძაში, სოფელ საროში, დღემდე ძველ, დარბაზული ტიპის სახლში ცხოვრობენ. მესხურ ოდაში საპატიო ადგილს 74 წლის ელენეს მზითევი იკავებს. ამ მზითევს და ელენეს მოგონებას მამამთილთან ‘უმძრახობაზე’ ოჯახში ყველაზე მეტად უფრთხილდებიან.

მზითევი, ‘უმძრახობის’ ტრადიცია და ცხოვრება მესხურ ოდაში [Photo/Video]

ასპანიძეების ოდა სოფელ საროს შუაგულში დგას. ეს დარბაზული ტიპის სახლი ახლაც ისეთია, როგორიც ოდითგან, აშენების დროს ყოფილა. დღემდე ერთ მხარეს გომურია (საქონლის სადგომი), მეორე მხარეს კი საცხოვრებელი.

ოდაში შესასვლელად ვიწრო დერეფანს მიუყვები და ოთახში ხვდები. აქ ყველაფერს შრომისმოყვარე დიასახლისის ხელი ეტყობა, – ოთახში შეშის ღუმელი და ტელევიზორი დგას, თაროზე ძველი ჩემოდნები დევს.

„მეუღლის ნაქონია, ერთში წინდები, მეორეში ძაფები და სხვადასხვა საჭირო ნივთები მიწყვია“, – გვეუბნება ელენე ასპანიძე და მეორე ოთახისკენ მიგვიძღვება. მეორე ოთახს საძინებლად იყენებენ. კედლებზე ხელით ნაქსოვი ხალიჩებია გაკრული, – „ესენი ფიჩვებია. ერთი, როცა მომიყვანეს, დედამთილმა მაჩუქა, ჩემი ქმრის და ჩემი სახელი აწერია, მეორე კი ჩემი მზითევია, დედაჩემის დედამ მომიქსოვა“.

მზითევი, ‘უმძრახობის’ ტრადიცია და ცხოვრება მესხურ ოდაში [Photo/Video] მზითევი ამით არ ამოიწურება, ამავე ოთახში მაგიდაზე ძველებური საკერავი მანქანა, ბალიშები და კიდობანი დევს. კიდობანშიც მზითევი – თეთრეული აწყვია. ოთახში არსებულ ყველა ნივთს დიასახლისის ხელით მოქსოვილი სპეციალური გადასაფარებელი ამშვენებს.

„ჩვენ დროს მზითევი აუცილებლად უნდა მიგეტანა. 20 წლის გავთხოვდი, ნახევარი საუკუნეა ამ ყველაფერს ვინახავ“, – გვეუბნება ელენე ასპანიძე.

ოთახის დათვალიერებას ვაგრძელებთ. კედელზე, ხალიჩის შუაგულში, ძველ ქართულ სამოსში გამოწყობილი კაცის და ქალის ფოტოა: „ჩემი დედამთილ–მამამთილი არიან, საპატიო ადგილი უკავიათ“.

მზითევი, ‘უმძრახობის’ ტრადიცია და ცხოვრება მესხურ ოდაში [Photo/Video] მამამთილს ოჯახში მხოლოდ ფოტოთი არ იხსენებენ. ელენე ამბობს, რომ მზითევთან ერთად, ამ სოფელში ძველად უმძრახობის ტრადიციას იცავდნენ და უმძრახობის შინაარსს გვიხსნის. მისი თქმით, ძველად, პატივისცემის ნიშნად, ოჯახში ახალმოყვანილი რძალი მამამთილს წლების განმავლობაში არ ელაპარაკებოდა.

„წინათ ასეთი წესი იყო, პატარძალი უნდა დაუმძრახებულიყავი, როგორ შეიძლებოდა მამამთილთან სიტყვა წარმოგეთქვა. 7 წელი ვეუმძრახე მამამთილს. მხოლოდ ხელებით ველაპარაკებოდი. ბავშვს რომ ვაჭმევდი, ჩუმად, ხან ფული შემომაძლია ხმა გამეციო, მაგრამ არ შეიძლებოდა. ეგრე არ იყო დურმიშხან?“ – საუბარში ქმარს იმოწმებს ელენე ასპანიძე.



დურმიშხანს და ელენეს 55 –წლიანი თანაცხოვრება აქვთ. მესხურ ოდაში ხუთი შვილი გაზარდეს, ოთხი ვაჟი და ერთი გოგო. მათთან არცერთი აღარ ცხოვრობს.

ოდის დატოვება ცოლ–ქმარს არასოდეს უფიქრიათ. აქ თავს კარგად გრძნობენ. ახლა ცოლ–ქმარს მხოლოდ ერთი ნატვრა აქვთ.

„ჩემი ბიჭი, რომელიც პორტუგალიაშია, ჩამოვიდეს და დავაქორწინო, მერე თუ გინდა მოვკვდე. მე უკვე გამივლია ჩემი დრო და ჩემი ხანა“,– გვეუბნება ელენე, გვემშვიდობება და ოდიდან გომურში შედის, იქ ხუთი ძროხა და ორი პატარა ხბო ელოდება, – ახალმოგებულები არიან, შვლებივით ვუვლი, ბოთლით ვაჭმევ რძეს. დილით ხუთ საათზე ვდგები, ყველაფერი უნდა მოვასწრო, საქმის მეტი რა არის შვილო?! მთელი დღე ასე ვშრომობთ ცოლ–ქმარი“.

მზითევი, ‘უმძრახობის’ ტრადიცია და ცხოვრება მესხურ ოდაში [Photo/Video]

[თინათინ ზაზაძე, ასპინძა]


19.02.2020 შრომატევადი და დაძლეული საქმე - მენტორის სტატუსის მქონე მასწავლებლები სამცხე-ჯავახეთიდან

13.02.2020 ჟვანიას სკოლამ ახალციხეში 'სახელმწიფო ენის სწავლების პროგრამის' კურსდამთავრებულებს სერტიფიკატები გადასცა

10.02.2020 ესეების კონკურსში ახალციხელმა სტუდენტებმა გაიმარჯვეს

10.02.2020 ახალქალაქში, ბურნაშეთისა და ბარალეთის სკოლებში ბიბლიოთეკები მოეწყო

22.04.2014 ჯილეხისა და თურქულის ვაქცინაცია დაიწყო

08.04.2014 ასპინძის საავადმყოფოს ექიმებმა შპს „ადითს“ სასამართლო მოუგეს

05.04.2014 რა იცვლება სასწრაფო სამედიცინო დახმარებაში?

21.03.2014 საქართველოში ჰოსპიტალური საწოლების რაოდენობამ იკლო

21.02.2020 ‘ტაო’ გასვლითი მატჩისთვის ემზადება

20.02.2020 ‘ორნამენტები ქართულ მეჩეთებში’ - 25 თებერვალს კატალოგის პრეზენტაცია გაიმართება

20.02.2020 დაგვეხმარეთ მაუწყებლის გადარჩენაში – აჭარის ტელევიზიის ჟურნალისტები დიპლომატებს მიმართავენ

19.02.2020 ახალციხის სამუსიკო სკოლას რეაბილიტაციისთვის ამზადებენ

24.12.2013 ბორჯომში ახალ წელს ერთი დღით ადრე იზეიმებენ

27.11.2013 რეჟისორი ვახტანგ ბერიძე მესხეთის თეატრს მადლობას უხდის

25.10.2013 ახალციხეში ანსამბლ „სეუს“ კონცერტი მიმდინარეობს

24.10.2013 მესხეთის თეატრში "წვიმის გამყიდველს" წარმოადგენენ

15.02.2020 თისელის ამბებს გიყვებით [ფოტო]

14.02.2020 გორგული – გორებს შორის მოქცეული სოფლის ისტორია [ფოტო/ვიდეო]

21.01.2020 ქიქინეთი - ბუნების იმედად დარჩენილი სოფელი [ფოტო/ვიდეო]

17.12.2019 ლოკოკინებზე ‘მონადირეები' სოფელ აწყვიტიდან [ფოტო/ვიდეო]

მსგავს თემაზე

სოფელ საროში 30–ოჯახიდან 5 ისევ მესხურ ოდაში ცხოვრობს [Video]
ხმა სოფლიდან: ცხოვრება მესხურ ოდაში [Audio]
სოფელი მესხური დარბაზებით  [Photo]
როგორ ამზადებდნენ  მესხურ ოდაში ჩეჩილ ყველს [Video]
სოფელ ჭობარეთში ინგრევა ოდა, რომელიც კულტურული მემკვიდრეობის ძეგლია [Photo]
'ზამთრის' ცოლები
ოჯახში ძალადობის მსხვერპლი სოფელმაც გარიყა