რა საჩივრით მიმართავს ხევაშენში გარდაცვლილი ახალგაზრდის ოჯახი მთავარ პროკურატურას

ხევაშენში გარდაცვლილი ბესო ენდელაძის ოჯახის წევრები ადიგენის რაიონულ სამმართველოსა და სამცხე-ჯავახეთის საოლქო პროკურატურას უნდობლობას უცხადებენ, ამიტომ ითხოვენ, რომ საქმე საქართველოს მთავარმა პროკურატურამ გამოიძიოს.

„ადიგენის რაიონული სამმართველო და სამცხე-ჯავახეთის საოლქო პროკურატურა გამოძიებას ვერ აწარმოებს ობიექტურად. გარდაცვლილის ოჯახის წევრებს მიაჩნიათ, რომ გამოძიება ტენდენციურია, ეს განცდა მათ საგამოძიებო ორგანოებთან ურთიერთობის შემდეგ გაუჩნდათ“, - ამბობს ახალგაზრდა იურისტთა ასოციაციის ადვოკატი რევაზ რევაზიშვილი.

რევაზიშვილი ენდელაძის საქმეში 24 აპრილიდან ჩაერთო. აქამდე დაზარალებულებს ინტერესების დამცველი არ ჰყავდათ.

„გამოძიებაში დაზარალებულის ადვოკატს ერთადერთი ფუნქცია აქვს, დაესწროს დაზარალებულების დაკითხვას. დოკუმენტებსაც თავად დაზარალებულები წერენ, თავიანთი სახელით, ოღონდ ადვოკატის დახმარებით“, - გვიხსნის რევაზიშვილი.

მისი თქმით, მთავარ პროკურატურაში შესატანი საჩივარი უკვე მზადდება: „საჩივარს პროკურატურაში 30 აპრილს შევიტანთ და მოვითხოვთ საქმის სამცხე-ჯავახეთის საოლქო პროკურატურიდან აცილებას“.

შეგახსენებთ, რომ 23 წლის ბესო ენდელაძე 16 დეკემბრის ღამეს სოფელ ვარხანში უგონო მდგომარეობაში, სისხლის გუბეში ნახეს. იგი უგონო მდგომარეობაში 47 დღე იყო. ოჯახის წევრები და ახლობლები დარწმუნებული არიან, რომ ბესო მოკლეს, თუმცა საქმის ძიება ამ დრომდე 276-ე მუხლით, მიმდინარეობს, რაც ავტოსაგზაო შემთხვევას გულისხმობს.

[თამუნა უჩიძე, ახალციხე]